經歷詳述:
未試過睇醫生睇到一肚氣。一入到間診所好舊好細好焗，坐滿晒人完全無通風，驚死你啲菌焗唔住係到咁。

如是者一路等約2-30分鐘，因為佢求求其每個都係入一入去就出返黎，所以唔係等得好耐，除左打針個啲耐少少。等既過程都有聽到佢係到勸啲老人家打針，啱啱上嚟睇評論懷疑佢就係靠氹啲老人家打針賺錢。

好，跟住入到房，位「醫生」眼尾都唔會睄下你，叫佢都唔會應。咁佢一路喺度寫嘢我就喺度望住佢，無醫生袍，個樣似街邊路過既路人甲，不過唔緊要，如果佢盡返醫生既職責依啲外表既野都唔係問題黎，不過結果就係同個樣一樣咁唔專業。

瞓咗一陣，佢叫我講下有咩病徵，我話流鼻涕咳喉嚨痛頭痛，無左味覺唔知係咪中左covid，跟住佢就答我：咁我都唔知你係咪中左架，你想知咪自己買個快測測下囉。我聽到佢咁講野已經心知不妙，依條友唔係一般地西，加上我家下又唔係問你，我都係講自己唔舒服同疑慮姐，請問得罪你啲乜？跟住佢叫我擰轉身俾佢聽背脊，聽完⋯ok出去等拎藥，我話我想要埋病假紙，佢唔應機，正係話出返去等，成個過程唔洗1分鐘。

總之成個過程一啲禮貌都無，全程無望過人，我開頭仲講唔該，後尾唔該都慳返，條友根本唔值。無醫德、無禮貌、唔識尊重，唔知佢點解會揀做醫生，一啲都唔適合。今次第一次睇，下次我寧願搭車去隔離區睇醫生都唔會睇佢。

簡評:
個人觀感- 態度有失、醫德有損
經歷過程- 醫護之語調態度令人無所適從
推介意見- 本人絕對不會再作光顧