經歷詳述:
我爸爸喺健康院被發現心率太低 (最低每分鐘 38 下), 建議佢入院檢查, 但排政府要 2-3 年後, 衰 D 講無事都排到有事.

經朋友介紹搵到張醫生, 醫生睇返 D 病歷, 話其實阿爸上年已經有呢個低心率病, 報告寫第一期, 但健康院果陣無建議點處理. 張醫生安排阿爸做24小時心臟 checking, 佢驚阿爸係第 3 期, 叫佢等報告期間生活上要小心, 如果頭暈就要留意, 又叫家人留意佢瞓覺情況, 驚佢隨時中風. 之後確診係第 2 期, 叫阿爸唔洗擔心, 裝返個心臟起搏器就 OK. 佢對老人家好好, 耐心解釋病情, 要做咩檢查, 做手術情況及護理, 邊間醫院好D, 收費等, 所有野都好全面講解. 我爸係個好易擔心既人, 佢都好信得過張醫生.

最初我地諗緊喺政府醫院做手術定私家, 因為唔算好危急. 張醫生都有俾意見, 寫定 referral letter, 唔會話為咗賺錢就係咁叫你搵佢做手術. 最後阿爸唔想等, 我地決定搵張醫生做手術. 過程好安心, 手術後既檢查張醫生都唔會馬虎, 仲叫我地排定公立醫院之後 check 部起搏器, 就唔洗次次俾專科費用 check 果 5-10 分鐘.

張醫生真心係一個有醫德又叻又善良既醫生, 希望呢 D comment 幫到大家搵到好醫生. 因為當自己/家人有病時, 其實好徬徨. 所以事隔2 年幾我都想俾返 credit Dr. Cheung, thank you!

簡評:
個人觀感- 詳盡親切、耐心施診
經歷過程- 醫生會從病人出發去提供意見
推介意見- 不可多得，值得等待