經歷詳述:

我係一個特別容易生眼瘡嘅人，一年最少都會生幾次，有時做熱敷同埋搽消炎藥膏會自己好返。有時眼瘡大粒咗自己好唔返就要去搵醫生𠝹，呢幾年已經幫襯過幾個醫生，本來想搵返自己睇開個醫生又就唔到我放假時間。於是喺網上搵到許鍵文醫生診所即打電話預約時間，聽電話個姑娘即刻加咗個位俾我第二日一早睇，因為隻眼已經試過熱敷同埋用藥都完全冇好返的跡象，而且仲越嚟越腫整到隻眼都變細埋。得知第二日一早都可以加多個位俾我睇真係好感激。當日上到診所登記同做檢查，坐咗一陣就到我見醫生，入到醫生房許鍵文醫生主動同我打咗個招呼叫我坐低先，於是問我隻眼點樣，經過一輪問症後就開始幫我滴左啲藥水做檢查，檢查完就同我講粒眼瘡咁耐都唔散又試過熱敷同滴藥水已經冇紅就算再用藥都幫唔到我太多，最快嘅方法就係做個小手術清走啲膿。我今次正係想盡快𠝹咗粒瘡，之前有晒經驗即刻話ok，之後醫生叫我出邊坐坐先，一陣姑娘會安排幫我滴麻醉藥，等麻醉完成再做手術。姑娘非常體貼一邊滴藥水一邊安慰我叫我唔使驚一陣間做手術除咗打針少少痛手術過程係一啲都唔會痛。睇住啲病人出出入入一輪之後終於到我做手術喇，個手術好快完成咗又真係除咗打針個下痛成個手術一啲都唔痛，宜家做完手術4日已經完全好返曬。真係要分享下今次愉快的睇醫生經歷，手術過程以之前嘅經驗對比呢次真係一啲都唔痛，一來姑娘好為病人著想落麻醉藥夠同埋醫生又細心溫柔整個過程完全感受唔到手術的痛楚。希望要𠝹眼瘡嘅人又怕痛嘅人有個參考，咁多次𠝹瘡經驗呢次係我覺得完全唔痛嘅一次。

簡評:
個人觀感- 詳盡親切、耐心施診
經歷過程- 醫生會從病人出發去提供意見
推介意見- 已視為本人的必然選擇