經歷詳述:
我太太因為長期聲沙，同埋講嘢唔夠氣，經普通醫生轉介去睇佢。佢同我太太照完喉鏡之後話有粒息肉喺聲帶度，但係冇畀相或影像畀我哋睇。佢話我太太講嘢唔識用氣，只係用死力發聲。佢叫我太太休息多啲就會自己好，同埋學點樣用氣去講嘢。跟住就收錢攞消炎藥。但係我太太停職三個星期都冇乜起色，再去睇佢，佢都話要休息。如是者擾攘咗幾個月，我哋發覺唔對路，就轉睇另一位醫生。另一位醫生話息肉係唔可能靠休息可以好返，只可以做手術割咗佢，而且話我太太粒息肉已經開始嚴重，要儘快割除，而且畀咗張相我哋攞走參考，我哋攞住張相再睇多個醫生，結果相同，卒之上星期安排入院割咗粒息肉。

無獨有偶，原來我爸爸都曾經睇過哩個勞醫生，佢都係叫我爸爸多啲休息。點知冇起色得嚟，重愈嚟愈嚴重。結果睇另一個醫生，發覺原來係睡眠窒息症！結果都係要入醫院做手術。

我都唔知哩個勞醫生嘅專科資格點樣考返嚟，甚至唔知佢個醫生資格點樣得嚟，我淨係知佢咁樣睇症法，只係會令到病人延誤治療，甚至會被佢害死！因為作為病人，係會相信醫生所講嘅一切，尤其係由醫生轉介嘅專科醫生。如果哩個網站評分嗰欄有得畀 0 分或者負分，我一定畀。如果要我推介哩個醫生畀人，我一定會推介畀仇家！
簡評:
個人觀感- 態度有失、醫德有損
經歷過程- 醫護之語調態度令人無所適從
推介意見- 本人絕對不會再作光顧